Urrian, azaroan eta abenduan, argazkiak ikusgai egongo dira Zazpi Kaleetako, Satimamiko, Gurutzetako, Basauriko eta Santutxuko geltokietan
Osakidetzaren 40. urteurrena ospatzeko ekintzetako bat da eta, ospakizunak amaitzeko, azaroaren 8an, ospakizun-ekitaldi bat egingo da Vitoria-Gasteizko Europa Jauregian
2023an, Osakidetzak 40 urte beteko ditu, eta urteurrena ospatzeko, “Osasuna, inoiz baino gehiago” lemapean, zenbait ekintza egingo dira urtean zehar; ekintza horien artean Bilboko Metroan egingo den argazki-erakusketa nabarmendu behar da. Erakusketan irudietan jasotzen dira Osakidetzaren lana haren profesionalen jardueraren bidez gidatzen duten balio eta kontzeptuak, kontuan izanik pazientea duela beti ardatz nagusi.
“Osasuna, inoiz baino gehiago”-Osakidetzaren 40. urteurrena argazki-erakusketarako erakundearen 40. urteurrenerako aukeratu den lema erabili da, eta, erakusketan, 19 argazki daude, formatu handikoak, eta erakusketa ibiltaria egingo da haiekin datozen 3 hilotan geltoki enblematikoenetan edo, Bilboko hiri inguruko 49 geltokietatik, Osakidetzako osasun-zentroetatik hurbil daudelako nabarmentzen direnetan.
Hala, datorren urriaren 31ra arte, erakusketarako aukeratutako irudiak Zazpi kaleak geltokian egongo dira. Ondoren, azaroko lehen 15 egunetan Santimamiko eta Gurutzetako geltokietara eramango da erakusketa, eta, azaroko bigarren hamabostaldian, Basauriko metro-geltokira. Azkenik, abenduaren 15era arte, argazkiak Metro Bilbaoko Santutxuko geltokian egongo dira ikusgai, eta, orduan, amaitutzat emango da erakusketa.
Ospakizun-jardunaldia eta ekintzak
Urtean zehar eginiko ekintzekin amaitzeko, Osakidetzaren 40. urteurrena ospatzeko jardunaldia egingo da azaroaren 8an Vitoria-Gasteizko Europa Jauregian.
Bileran ekitaldiaren erakunde-izaera eta Euskadiko osasun-arloko profesionalen presentzia eta ahotsa izango dira.
Urtean zehar, ekintza batzuk planifikatu dira, Osakidetzako zerbitzu-erakunde guztien hausnarketaren eta parte-hartzearen ondorioz, eta ekintza horien bidez Osakidetza izan dena, dena eta etorkizunean izan nahi duena nabarmendu nahi izan da.
Osakidetzak sustatutako ekimen horiek bi eremutara bideratu dira: batetik, herritarrei zuzendutako ekintzak, hala nola urte-hasieran kirola eta osasuna elkarri lotuz osasuna sustatzeko eta gaixotasuna prebenitzeko egutegi bat argitaratu izana, edo Euskadi osoan “Osasunaren Eguna” ospatu izana, herritarren artean bizi-ohitura osasungarriak zabaltzeko. Eta, bestetik, profesionalei zuzendutako ekintzak, hala nola Osakidetzako Jardunbide Egokien Jardunaldia egin izana edo “Parte Hartu” hobekuntza-ideien lehiaketaren edizio bereziaren deialdia egin izana.
Osakidetzak 40 urte
Osakidetzak 40 urte bete ditu, eta jakitun dago bere lanak eta helburu nagusiak jarraitzen duela osasun-sistema publiko, unibertsal eta kalitatekoa bermatzea izaten, Euskadiko gizarte osoaren lorpen kolektibo gisa. Pertsonak arreta-gune izanik eta orainerako eta etorkizunerako bokazio gisa.
1983an Euskal Osasun Zerbitzuaren ibilbidea egiten hasi zen, zerbitzu unibertsala xede izanik eta euskal herritar guztiei osasun-arreta integrala emateko, eta 2023an dago orain; ibilbide horretan, erakundearen azken bosturtekoa markatu duten gertaerak nabarmentzen dira, besteak beste, Euskadiko Plan Onkologiko Integralaren ezarpena eta Euskadiko errezeta elektronikoaren garapena, bai eta Covid-19aren aurkako txertaketa-kanpaina masiboak herritar guztientzat, Osakidetzan geriatriak sartzea edo erakundean Emakume eta Gizonen I. Berdintasun Plana abian jartzea ere.
