XI. edizioa prestatzen ari da Egurtek, Zurezko Arkitektura eta Eraikuntzaren Nazioarteko Foroa, zeina sektorean ekitaldi garrantzitsua baita maila globalean. 2024an izan zuen arrakastaren ondoren, ekitaldia BECera dator berriz ere, zura klima aldaketaren aurkako borrokan funtsezko material gisa eta eraikuntza jasangarrian berrikuntzaren eragile gisa sustatzeko konpromisoa berrestera.
Foroa esperientziak partekatzeko, sinergiak bultzatzeko eta, karbono-aztarna murrizteko faktore erabakigarria den aldetik, zuraren erabilera bultzatzeko topagune estrategikoa da. Azpimarragarria da foroko abangoardiako kongresua. Bertan, munduko arkitekturaren arloan ospetsua den jendea bilduko da, euren lan aipagarrienak aurkeztuko dituzte, eta eremu hori definitzen ari diren berrikuntzei eta joerei buruzko ikuspegi paregabea emango dute.
Foroaren ibilbidean zehar, kongresuan, besteak beste, Shigeru Ban, Cazú Zegers, Michael Green, César Portela, Lone Wiggers, Alex de Rijke, Janne Kantee, Andrea Deplazes, Gion Caminada, Mikio Tai, Julius Natterer, Iñaki Aspiazu, Andrew Waugh, Georg W. Reinberg eta Bernardo Bader izan dira. Arkitekturak duen eginkizun eraldatzailearen jakitun, aurkezten diren proposamen askok ongizate soziala eta indibiduala jartzen dute proiektu arkitektonikoaren erdigunean. 2024ko edizioan, besteak beste, David Chipperfield (Pritzker Saria), Philippe Madec, Anne Cecilie Haug, Beñat Saratxaga eta José Toral izan ziren.
Bestalde, Baskegurrek, Euskadiko Zuraren Elkarteak, antolatutako jardunaldi teknikoetan sektorearen etorkizunerako erabakigarriak diren gaiak jorratuko dira. Aldi berean, Expo Gunean irtenbide abangoardistenak eta merkatuaren azken joerak aurkeztuko dira. Gune horretan, Innovation Workshop-ak egingo dira berriro, non enpresa erakusketariek hainbat arlotan (adibidez, ingeniaritza, egituren softwarea, interiorismoa eta eraikuntza jasangarria) dituzten produktu eta zerbitzu berrienak emango dituzten ezagutzera.
Azkenik, foroaren mugarrietako bat den aldetik, Egurtek Sariak banatuko dira zeremonia berezi batean. Hainbat kategoriatako proiekturik onenak sarituko dira: eraikingintza, interiorismoa, produktuaren diseinua, BOIS/EGURRA/MADERA (BEM) sari bereziak eta tokiko zuraren aintzatespen berezia (Basque Quality). Hautagaitzak jasotzeko epea 2026ko maiatzaren 4an amaituko da, 12:00etan, eta aurkezpena online egin beharko da. Oinarriei eta partaidetzari buruzko informazio guztia webgune ofizialean dago eskuragarri: https://egurtek.bilbaoexhibitioncentre.com/eu/sariak/egurtek-sariak-2026/.
