Gobernu Kontseiluak bi dirulaguntza zuzen onartu ditu Gobernuz Kanpoko Erakundeentzat. Guztira, 353.350 euro inguru izango dira, eta laguntza horiei esker, eLankidetza-Garapenerako Lankidetzako Euskal Agentziak, Berdintasun, Justizia eta Gizarte Politikak sailekoa, babestuko ditu emakumeen eta LGTBI+ pertsonen osasun mentala hobetzea eta izaera sozialeko enpresak bultzatzea.
Lehenengo zuzeneko dirulaguntza 300.000 eurokoa izango da eta medicusmundi Bizkaiari zuzenduko zaio. Euskadiko GGKEak laguntza teknikoko esperientzia pilotu bat proposatu die Honduraseko agintariei emakumeen eta LGTBI+ pertsonen osasun mentala modu integralean jorratzeko. Medicusmundi Bizkaiak 2015etik sortutako aliantzari esker, ekimenak generoan eta osasun mentalean erreferente diren euskal sektore soziosanitarioko pertsonen trukeak eta parte-hartzea izango ditu.
Bigarren dirulaguntza 53.350 eurokoa izango da, eta Anesvad Fundazioari emango zaio. Laguntza horri esker, Ghanan izaera sozialeko enpresei prestakuntza, laguntza teknikoa eta hasierako finantzazio laguntza emango zaie. Gainera, fundazioak arretarik gabeko gaixotasun tropikalak dituzten pertsonen ahalduntze ekonomikoa sustatu nahi du.
Diruz lagundutako proiektua esperientzia pilotu bat da, eta eLankidetzak etorkizuneko finantza-lankidetzarako tresna bat sortzeko azterketa eredu gisa hartuko du.
