Bere ustez, erantzukizun politikoak dituztenek pertsonen benetako behar eta kezkekin bat egitea lortzeko “erronkaren aurrean gaude”, “aldaketa eta ziurgabetasun handiko” testuinguru batean
Mikel Torres Eusko Jaurlaritzako Ekonomia, Lan eta Enplegu sailburu eta lehendakariordeak azpimarratu du oso garrantzitsua dela ebaluazioa instituzionalizatzea, erabaki publikoen kalitatea “hobetzeko”: “Arduradun politiko gisa, garaiz iristen diren ebaluazioak eskertzen ditut, gomendio egingarriekin. Ebaluazioetatik espero dugu zoru sendo bat emango diguten zorroztasun metodologikoa, erabakiak hartzean beldurrik gabe laguntzeko, ebaluazioak ez baitu erabaki politikoa ordezkatzen, baizik eta haren kalitatea handitzen, haren arrakasta probableago egiten”.
Besaldi – Euskadiko Enplegu eta Gizarteratze Politiken Ebaluazio Organoak antolatutako lau topaketei amaiera eman zaie ostegun honetan Bilbon, eta Torresek gogorarazi du instituzionalizazio hori “bi aldiz beharrezkoa” dela “hain sentikorrak diren arloetan”, hala nola enpleguan eta inklusioan, azken urteotan “erreforma sakonak” egin baitira.
Hau dela eta, Torres lehendakariordeak azpimarratu du erantzukizun politikoak dituztenek “pertsonen benetako behar eta kezkekin” bat egiteko “erronkaren aurrean gaudela”, batez ere “ziurgabetasun eta aldaketa teknologiko, ekologiko eta demografiko handiko une historiko batean”, eta adibide gisa jarri du Zohran Mamdanik New Yorkeko alkate berri gisa lortu berri duen garaipena.
Honen harira, Mikel Torresek Besaldik Euskal Herriko Unibertsitatearekin duen lankidetza estrategikoa azpimarratu du, politika publikoen ebaluazioari buruzko prestakuntza-ekimenetan gauzatzen dena, eta “oso ondo” garatzen ari dena. Era berean, esan du topaketekin batera egindako ebaluazio-prozesuek ahalbidetu dutela “hausnarketak eta deliberazioak eta gauzatzeak eta kudeaketak elkar elikatzea”, enplegu- eta inklusio-politiken etengabeko hobekuntzari lagunduz.
Besaldi topaketak
Besaldik antolatutako topaketa zikloak hausnarketarako, elkartrukerako eta ikasketarako gune bat suposatu du, Euskadiko enplegu eta inklusio politiken ebaluazioari buruz. Egindako lau jardunaldietan, adituen, erakundeetako arduradunen eta gizarte-eragileen parte-hartzea sustatu da, ikuspegi eta esperientzia desberdinek bat egin eta elkar aberastu dezaten ahalbidetuz.
Topaketa hauek politika publikoen etengabeko hobekuntzarekin konprometitutako komunitatea sendotzen lagundu dute, zorroztasun metodologikoa eta lankidetza bultzatuz, enpleguaren eta inklusioaren arloko egungo eta etorkizuneko erronkei aurre egiteko funtsezko zutabe gisa.
