Kultura, Kirol eta Turismoko kontseilaria Rebeca Esnaolak eta Turismoko zuzendari nagusi Ana Rivasek parte hartu dute Industria eta Turismo Ministerioak eta autonomia-erkidegoek deitutako bileran, turismo-sektorearen eraldaketa integrala eta jasangarria bultzatzea helburu duen Europako funtsen exekuzioaren azken zatia sinplifikatzea eta arintzea onartzeko.
Espainiako Gobernuaren eta Europako Batzordearen arteko negoziazioaren ondorioz, funtsak erabat gauzatzeko epeak luzatzea eta mugarriak ziurtatzeko prozesua sinplifikatzea lortu da. Horrela, 2026ko ekainerako iraunkortasun turistikoko planak gauzatu beharko dira.
Industria eta Turismo ministroa den Jordi Hereuk nabarmendu nahi izan du Espainiako Gobernuak Espainiako turismo-sektorearen Modernizazio eta Lehiakortasun Plana abian jartze aldera, elkarrizketarako, jarraipenerako eta laguntzarako izandako konpromisoa. Plan berria da, 3.400 milioi eurokoa.
Era berean, Energia Eraginkortasunaren programaren epeak luzatu egin dira (gauzatze-eguna 2026ko ekainera arte luzatu da) eta Azken Millako norgehiagoka-deialdiak edo Ondare Historikoa erabilera turistikorako birgaitzeko deialdiak.
Esnaola kontseilariak honela nabarmendu du: “Nafarroak eskatutako mugarriak jada betetzen zituen onartutako aldaketarik gabe, eta justifikazio-maila onena duen bigarren komunitatea gara. Egia da aldaketa horri esker malgutasun handiagoa izango dugula azken hilabete hauetako lanean, batez ere erakunde onuradunei erreparatuta”.
Europako Next Generation funtsak gure Komunitaterako 72 milioi euro inguruko inbertsioa ekartzen dute, eta Helmugan Turismoa Garatzeko 16 Plan (HTGP) gauzatuko dira. Plan horiei Turismo Zuzendaritza Nagusiaren ekimenak gehituko zaizkie, Helmugen arteko Kohesio Ekintzak (HKE) deiturikoak, Nafarroako Landa-eremura, Done Jakue Bidera edo Enogastronomiara bideratuak, 17 milioi eurotik gorako inbertsioa dutenak. Nafarroan, planak lurralde osoan zehar hedatzen dira, eta Foru Komunitate osoko ehun udalerri baino gehiagotara iristen dira, HTGPren baten barruko 300 proiekturen bidez.
2030 Turismo Estrategia, garraioa eta etxebizitza
Astearte honetako bileran, turismoaren gobernantzarekin lotutako beste gai garrantzitsu batzuk ere jorratu zituzten. Espainia 2030 Turismo Estrategiaren dokumentua aurkeztu die Ministerioak autonomia-erkidegoei, Ministroen Kontseiluak 2025eko azken hiruhilekoan onartua, eta positibotzat jo du guztiek gure herrialdeko turismoaren etorkizunerako behin betiko ibilbide-orria osatzeko prozesuan izandako parte-hartze aktiboa. Era berean, sektorialean, garraioen konektibitatearen eta azpiegituraren garrantziaz aritu dira, Espainiako turisten helmuga turistikoak eta mugikortasuna egituratzeari begira.
Azkenik, bileran, Helmugen Plataforma Adimendunaren (HPA) eta Berrikuntza Irekiko Plataformaren (BIP) gauzatze-egoera eta benetako lerrokatze-maila aztertu dituzte; horrez gain, errentamenduen erregistro bakar eta leihatila bakar digitalari buruzko 1312/2024 Errege Dekretua ezartzearen ondorioak eta Estatuko Administrazio Orokorraren jardueren ebaluazioa, lurralde-garapen turistikoan duten eraginari dagokionean.
