Barakaldo musika ekoizpen handi baten agertoki bihurtuko da berriz ere ekainean, Barakaldoko Orfeoiari esker. Orfeoiak Aires del Norte aurkeztuko du, XX. mendearen hasieran girotutako itsas zarzuela, itsasoa beren bizimodua egin zutenen bizitza, sentimenduak eta istorioak omentzen dituena. Alberto Núñez Barakaldok konposatutako obra Clara Campoamor Gizarte Etxean antzeztuko da ekainaren 26an eta 27an, 19:00etan. Aurretik, ekainaren 20an, 20:30ean, lehen eszenaratzea izango du Castro Urdialesen.
Asmo handiko ekoizpena da eta 70 pertsona inguruk parte hartzen dute, Zabalguneko Abesbatzaren, Castro Urdialeseko dantza taldearen eta Alberto eta Jesus Mari Zaballa tenoreen laguntzarekin. Ikuskizunak 90 minutu inguruko iraupena izango du.
Antzezpen horren atzean bost hilabete baino gehiagoko lan gogorra dago. Entseguak urtarrilaren 10ean hasi ziren, eta formatu handiko proposamen artistiko bati forma emateko aukera eman dute, tokiko kultur taldeen antolaketarako eta sormenerako gaitasuna agerian utziz. «Orfeoiaz hitz egitea Barakaldoko historia kulturalaren zati garrantzitsu bati buruz hitz egitea da. Asko dira erakunde honetan musikarekiko duten pasioa gure hirian partekatzeko gune bat aurkitu duten bizilagunen belaunaldiak. Azpimarratu nahi dut kultur erakunde batentzat horrelako ekoizpen bat bultzatzeak suposatzen duen ahalegina, antolakuntza bere gain hartuz eta Barakaldori kalitatezko proposamen artistiko bat eskaintzearen aldeko apustua eginez. Sarreren zati handi bat saldu izanak erakusten du interesa, ilusioa eta gogoa dagoela lan honetaz gozatzeko», adierazi du Amaia del Campo alkateak aurkezpenean, Alberto Núñez Barakaldo eta Jose Vellarino obraren konpositore eta Barakaldoko Orfeoiaren lehendakariarekin batera.
Sarrerek 15 euroko prezioa dute eta, antzezpenetarako aste batzuk falta direnean, aurreikusitako edukieraren %75a saldu da.
