Barakaldon ‘Bi ilunabarren eguna’ erakusketa ibiltaria izango da ekainaren 10etik 19ra bitartean. Eusko Jaurlaritzak bultzatutako dibulgazio-proposamen bat da, datozen urteetako fenomeno astronomiko apartenetako bat herritarrei helarazten diena: Eguzki eklipse osoa, datorren abuztuaren 12an Euskadin ikusgai izango dena. Erakusketa Clara Campoamor Gizarte Etxean bisitatu ahal izango da eta eklipseen mundu liluragarrian zehar ibilbide didaktikoa eskaintzen du.
Panel ilustratuen, irudien eta jende guztiarentzat eskuragarri dauden azalpenen bidez, bisitariek eguzki-eklipseak eta ilargi-eklipseak nola gertatzen diren jakin ahal izango dute, baita gertaera horien inguruko gako zientifikoak ezagutu ere. Erakusketaren helburua da jakin-mina piztea eta astronomiarekiko eta zientziadibulgazioarekiko interesa sustatzea, herritarrei aparteko fenomeno bat hurbilduz, datorren udan eguna gau bihurtuko duena une batzuetan.
Bisita gidatuak Aranzadiren eskutik
Erakusketa Barakaldora iritsi dela eta, ekainaren 15ean, igandea, bi bisita gidatu antolatu dira Aranzadiren eskutik. Lehenengoa 18:00etan izango da euskaraz eta bigarrena 19:00etan gaztelaniaz, biak Clara Campoamor Gizarte Etxean. Parte hartzeko aldez aurretik izena eman beharko da, aurrez aurre edo telefonoz 944 789 552 eta 944 789 485 zenbakietan, edo Udalaren Egoitza Elektronikoaren bidez BakQ bidez.
Era berean, ekainaren 17an, asteartea, 18:30ean, Clara Campoamor Gizarte Etxean ‘Eguzki-eklipsea: eguna gau egiten denean’ dibulgazio-hitzaldia emango du Elvira Gutierrezek, Euskal Herriko Unibertsitateko (EHU) Fisika Aplikatuko Saileko irakasleak. Sarrera doakoa izango da eta sarrera librea da lekua bete arte.
Gainera, eklipsearen webgune ofizialean dibulgazio-edukiak, fenomenoa modu seguruan behatzeko aholku praktikoak, multimedia-baliabideak eta lotura interesgarriak aurki daitezke, gertaera astronomiko horren ezagutzan sakontzeko.
