Udal Hilerria eraberritzen hasi dira, instalazioen egoera hobetzeko, irisgarritasuna indartzeko eta bizilagunentzako ingurune seguruagoa bermatzeko. Obrak 900.000 eurotik gorako aurrekontua du, eta honako hauek izango ditu ardatz: zortzi nitxo bloke birgaitzea, eta urbanizazioa eta instalazioak hobetzea, gutxi gorabehera 2.400 metro koadroko azaleran, kanposantuaren iparraldeko erdialdean, San Bizente auzoan, eta hiru hezurtegi berri sortzea.
Gaur egun denboraren poderioz egoera txarrean dauden horma-hobiak osorik konpontzea, zoladurak berritzea, oinezkoentzako ibilbideak hobetzea, euri-uren saneamendu-sarea modernizatzea eta instalazio elektrikoa eta argiztapena eguneratzea aurreikusten dute lanek. Gainera, esku-hartzeak irisgarritasuna hobetzea ahalbidetuko du, ibilbideak indarreko araudira egokituz.
Bestalde, hiru hezurtegi modulu sortuko dira hilerrian, 185,85 metro karratuko azalera hartuko dutenak. Hezurtegiak eta haietarako sarbidea erabat irisgarriak izango dira. Jarduera honetan 170.000 euroko inbertsioa egingo da.
HILERRI IREKIA OBRETAN ZEHAR
Jarduketa une oro hilerriaren funtzionamendua mantenduz egiten ari da, sarbideak eta obren eta hileta-zerbitzuen arteko bateragarritasuna bermatuz. Exekuzio-epea 10 hilabetekoa izango da, eta faseka planifikatuko da, erabiltzaileek ahalik eta eragozpen gutxien izan ditzaten.
«Erreforma hori oso beharrezkoa zen hilerrira datozen familien eta pertsonen esperientzia hobetzeko. Oso adi egongo gara obraren garapenarekin, lanek eta bisitek bat egiten dutela bermatzeko», adierazi du Jon Andoni Uria auzoetako eta hiriko Obra eta Zerbitzuetako zinegotziak.
