UPV/EHUk Elena Larrauri legelaria Honoris Causa doktore izendatu du

PRUEBA

Euskal Herriko Unibertsitateak Pompeu Fabra Unibertsitateko Zuzenbide Penal eta Kriminologiako katedradun Elena Larrauri Honoris Causa doktore izendatzeko ekitaldia egin du, eta 2021ean eta 2022an Euskal Herriko Unibertsitatean tesia irakurri zuten doktore berriak ere izendatu ditu.

Eva Ferreira errektoreak goretsi egin du Honoris Causa doktore berriaren ibilbide akademikoa eta pertsonala: “Ohore egin dio gure erakundeari, ekitaldi honen bidez, Elena Larrauri gure kide bihurtu izana. Eta eskerrik asko, batez ere, Zuzenbide Penalaren eta Kriminologiaren arloko ikerketa-eta hausnarketa-ibilbide luze eta emankorragatik”.

Larraurik Fulbright-la Caixa beka jaso du, ‘Fullbright Scholar’ gisa Santa Barbarako Unibertsitatean (Kalifornia) aritzeko, eta Alexander von Humbolford beka, Frankfurteko Unibertsitatean ikerketa-egonaldi bat egiteko, eta Oxfordeko. Unibertsitateko All Souls College-ko Visiting Fellow izan da. Europako Kriminologia Elkarteko lehendakaria ere izan zen. Gaur egun, Kriminologiako eta Zigor Betearazpeneko Unibertsitate arteko Masterreko zuzendaria da. Haren ikerketa-ildoak aurrekari penalak, zigorren sistema eta genero-azterketa dira, justizia penalaren sisteman. Indarkeria matxistaren arazoa eta horri aurre egiteko prebentzio-estrategia eraginkorrenak ikusarazteaz eta horretaz gogoeta egiteaz arduratu da.

“Bat egiten dugu duen ibilbide akademiko emankorraren aitortzarekin, justizia penaleko sistema aztertzeko pentsamendu kritikoaren arloan bikaintasunaren erreferente bihurtu duen aitortzarekin”, nabarmendu du bere laudatioan Adela Asuak, UPV/EHUko Zuzenbide Penaleko katedradun emeritu, Estatu Kontseiluko kide ohi eta Konstituzio Auzitegiko lehendakariorde ohiak.

Bestalde, Elena Larrauri doktoreak eskerrak eman dizkio Euskal Herriko Unibertsitateari saria emateagatik. Eta bere ibilbide zientifikoari buruz hausnartu du, baita akademiak egungo gizartean duen zereginari buruz ere: “Akademikoak ez gara ez praktikoak ez ekintzaileak. Ez gara praktikoak administrazio bati laguntzeko orduan, arazoak alde batera utzita, eta ez gara aktibistak administraziotik egiten den guztia kritikatzeko orduan. Gure bertuterik handiena osotasun akademikoa da. Horrek esan nahi du, zintzotasun intelektuala, gure talde hurbileneko kide ez direnen teoriei kasurik egitea eta teoriekiko errespetua izatea, teoria horiek kritikatzeaz gain, haietatik ikasi duguna transmititzeko, zeren eta dakiguna guztion artean baitakigu”.

Elena Larrauri katedraduna UPV/EHUk 1982az geroztik Honoris Causa doktore izendatuko duen bederatzigarren emakumea da, Micaela Portilla (1993), Carmen Codoñer (2003), Marilyn Strathern (2011), Carmen Reinhart eta Maria Vallet Regi (2013), María Jesús Esteban (2016), Sonia Livingstone (2017) eta Jocelyn Bell-en (2022) ondoren.

Errektoreak zeremonian parte hartu duten doktore berriei ere zuzendu dizkie hitzak: “Lortu duzuen doktoretza ez da, noski, lehen urratsa, baina bai urrats garrantzitsua. Etorkizunerako orientabide izan behar duzue: lanbidean, irakaskuntzan, ikerketan, edozein esparrutan. Aukeratutako bidea edozein dela ere, doktoretzak ziurtatzen du zuen gaitasuna. Aurkezpen-gutun onena da, unibertsitateko abalik onena, baita handik kanpo ere”.

Ekitaldian parte hartu dute 2021 eta 2022an tesia irakurri zuten 886 pertsonetatik 300 batek. UPV/EHUn irakurritako tesien kopuruak gora egin du etengabe azken lau urteetan (390 2019an, 429 2020an, 424 2021ean eta 462 2022an). Kopuru horiek Euskal Herriko Unibertsitatea Espainiako lehen sei unibertsitateen artean kokatzen dute.