Nafarroako Gobernuko Memoria eta Bizikidetzako, Kanpo Ekintzako eta Euskarako Departamentuak, Kanpo Ekintzako Zuzendaritza Nagusiaren bitartez, mintegi birtual bat antolatu du toki entitateei eta elkarteei zuzendutako mugaz gaindiko lankidetzarako laguntzak ezagutarazteko eta azaltzeko. Mintegia otsailaren 6an, ostirala, izango da, 11:00etan, eta Ana Ollo lehendakariorde eta Memoria eta Bizikidetzako, Kanpo Ekintzako eta Euskarako kontseilariak irekiko du.
Deialdia Nafarroako Foru Komunitatearen eta Frantziako Pirinio Atlantikoetako departamentuaren arteko mugaz gaindiko harremanak garatzen eta indartzen laguntzen duten eta lankidetza-jarduerak garatzen dituzten toki entitateei eta irabazi asmorik gabeko entitateei zuzenduta dago. 2026ko edizio honetarako, 60.000 €bideratu dira laguntza horien mugaz gaindiko eta Europako lankidetzara. Jardunaldian parte hartzeko, aldez aurretik izena eman behar da otsailaren 5a baino lehen, formulario honetan.
Ollo lehendakariordeaz gain, Xabier Alcuaz Nafarroako Udal eta Kontzejuen Federazioko (NUKF) presidenteak; Iñaki Martínez de Vírgala Eskualdeen Arteko Lankidetzaren eta Kanpoko Herritarren zuzendariak eta Marina Roncal Eskualde arteko eta Mugaz Gaindiko Lankidetzarako Ataleko buruak ere parte hartuko dute mintegian. Ondoren, Erica Sola Arguedasko Udaleko zinegotziaren; Unai Irigarai Auritzeko alkatearen; eta Oskar Andueza Naturablai Elkarteko idazkariaren bitartez, aurreko edizioetan parte hartu duten proiektuen arrakasta kasuak ezagutzeko aukera izango dute bertaratutakoek. Mintegiaren amaiera Sergio Pérez Kanpo Ekintzako zuzendari nagusiak egingo du.
Mugaz Gaindiko Nafarroa
2025-2028 aldirako Nafarroako Kanpo Ekintzako II. Planaren jarduera-ardatz gisa (2. ardatza) hartuta, plan horren 2.3.8 ekintzak mugaz gaindiko lankidetza-jarduerak bultzatzeko dirulaguntzen deialdia jasotzen du, toki-entitate eta -erakundeei zuzenduta.
Nafarroak eta Pirinio Atlantikoetako Departamentuak (Nouvelle Aquitaine eskualdean) administrazioen arteko lankidetza formala dute 2001etik, urte horretan sinatu baitzuten mugaz gaindiko lankidetzarako lehen esparru-hitzarmena. Urte hauetan egindako lana garrantzitsua izan da eta aurrerapausoak eman ditu hainbat alorretan: arriskuen kudeaketa, lurralde-garapena, turismoa, kultura, kirola, mugikortasuna… Hitzarmen honen helburua da Nafarroako Gobernuaren eta Pirinio Atlantikoetako Departamentuaren arteko mugaz gaindiko harremanak eta lankidetza esparru instituzional batetik finkatzea, bai eta eragile ekonomiko eta sozialena ere, herritarren esparrutik.
Gaur egun, Nafarroak Akitania Berria Euskadi Nafarroa Euroeskualdearen (2024-2026) eta Pirinioetako Lan Komunitatearen (2025-2027) lehendakaritzak ditu, eta, beraz, Memoria eta Bizikidetzako, Kanpo Ekintzako eta Euskarako Departamentuak tokiko eta eskualdeko mugaz gaindiko lankidetza sustatzearen aldeko apustua areagotu du, 2020an sortutako laguntza-deialdi hau bultzatuz. Mintegiari buruzko informazio gehiago Kanpo Ekintzako webgunean kontsulta daiteke.
