- Otsailaren 19an irekiko da unibertsitateko tituludunek atzerriko enpresa eta erakundeetan nazioartekotze arloan trebakuntza jaso ahal izateko eskaera egiteko epea
- Industriara talentu berria erakartzea eta garatzea da Euskadi 2030 Industria Planaren lehentasunetako bat, “Industria hobea” ardatz estrategikoaren barruan, eta Euskadiko enpresek merkatu estrategikoetan nazioartekotzea sendotzeko lehentasunarekin, “Industria gehiago” ardatzaren barruan, bat egiten du
Aurten, 60 gaztek Industria, Trantsizio Energetiko eta Jasangarritasun Sailak berriro eskainiko duen nazioartekotzearen arloko BEINT beka bat eskuratzeko aukera izango dute. Beka horren bidez, unibertsitateko tituludunek atzerriko erakunde eta enpresetan nazioartekotze arloko prestakuntza jasotzeko aukera izango dute.
Programa otsailaren 19ko 00:00etan zabaldu eta martxoaren 31n itxiko da, eta gazteek lan-esperientzia eta esperientzia pertsonal paregabea lortzea du helburu. Esperientzia horrek gazteek aurretik zuten prestakuntza akademikoa eta profesionala bultzatu eta osatuko du, eta giza kapital espezialista sortzea eta dinamizatzea Euskadiko enpresentzat ere onuragarri izatea da helburu nagusia, gero nazioarteko merkatuetan beren ekimenak berme osoz bultza ditzaten.
Industriara talentu berria erakartzea eta garatzea da Euskadi 2030 Industria Planaren lehentasunetako bat, “Industria hobea” ardatz estrategikoaren barruan. Kasu honetan, Euskadiko enpresen nazioartekotzea merkatu estrategikoetan sendotzeko lehentasunarekin bat egiten du, noski, “Industria gehiago” ardatzaren barruan.
2.200 gaztek jaso dute prestakuntza 39 urtetan
Beint bekek ospe handia dute. Aurten, 40 urte beteko dituzte eta 2.200 gazte inguru trebatu dira orain arte. Bekei esker, atzerrian gehienez bi urtez praktikak egiteko eta nazioartekotze arloan prestakuntza jasotzeko aukera izaten da, gero nazioarteko merkataritzako profesional gisa itzuli eta, hala, Euskadiko enpresa-sarea indartzen lagun dezaten.
BEINT nazioarteko beken programak unibertsitateko prestakuntza eta atzerriko esperientzia praktikoa konbinatzen dituen programa mistoaren bidez nazioartekotze arloan gaitu nahi ditu unibertsitate-titulazioa duten gazteak, nazioartekotutako Euskadiko erakunde eta enpresen bidez.
BEINT programak bi modalitate ditu:
A modalitatea, 2 urteko guztizko iraupenarekin (3 fasetan banatuta).
B modalitatea: urtebeteko iraupena du, gutxi gorabehera, eta prestakuntzako 1. fasea eta atzerriko praktiketako 3. fasea konbinatzen ditu
Graduko goi-mailako unibertsitate-titulazioa duten 30 urtetik beherako Euskal Autonomia Erkidegoko gazteei zuzenduta dago, eta 30.000 € eta 80.000 € bitarteko dirulaguntza jasoko du pertsona bakoitzak, nazioarteko helmugako bizitza mailaren arabera, A modalitatea aukeratzen badute, eta 12.000 € eta 32.000 € bitartekoa B modalitatean.
Prestakuntzako ibilbidea eta ibilbide praktikoa
SPRI Taldearen Basque Trade & Investmentek (BasqueTrade) bultzatzen du BEINT eta aurten 40 urte beteko ditu. Hala, prestakuntza akademikoa eta esperientzia praktikoa bateratzen dituen bi urteko prestakuntza-ibilbidea eskaintzen du. Programa lau hilabeteko unibertsitate-prestakuntzarekin hasten da, EHUrekin, Deustuko Unibertsitatearekin eta Mondragon Unibertsitatearekin lankidetzan. Saio horietan, parte-hartzaileek kanpo-merkataritzari, nazioarteko negoziazioari eta salmenta-teknikei buruzko ezagutzak eskuratzen dituzte.
Fase horren ondoren, hamabi hilabeteko praktikak egiten dituzte nazioartekotzean espezializatutako erakundeetan, besteak beste, Eusko Jaurlaritzaren Kanpo Sarean, Espainiak atzerrian dituen Ekonomia eta Merkataritza Bulegoetan eta sektoreko beste erakunde batzuetan. Azkenik, atzerriko enpresetan, erakunde aldeaniztunetan edo nazioartekotzearekin lotutako beste erakunde batzuetan egindako zortzi hilabeteko egonaldi profesionalarekin osatzen dute ibilbidea, eskuratutako esperientzia sendotzeko.
Urtero, 150-180 gazte inguruk parte hartzen dute beka horiek jasotzeko hautaketa-prozesuan. Beka horiek lortzeko eskakizunak dira hauek: unibertsitateko titulazioa, ingeleseko B2 maila, EAEn erroldatuta egotea, eta aurretik atzerrian egindako praktika luzeetan antzeko programetan ez parte hartu izana. Hiru fasetan banatutako ibilbide osoari esker, parte-hartzaileek gaitasun profesionalak eta nazioarteko esperientzia lortzen dituzte, eta horrek erraztu egiten du lan-merkatuan sartzea, Euskadiko enpresen eta erakundeen nazioarteko jarduerari lotutako arloetan.
Ia lau hamarkadatan indarrean egon da orain arte eta BEINTen enplegagarritasun-indizeak ia erabatekoak dira. “Be international” lelopean, programak nazioartekotzean espezializatutako profilak trebatzen eta Euskadiko enpresek atzerriko jarduerarekin lotuta dituzten beharrak asebetetzen laguntzen jarraitzen du.
