Nafarroako Gobernuak baimena eman dio, gaurko bilkuran, Garraioen eta Mugikortasun Iraunkorraren zuzendari nagusiari Iruñea eta Donostia artean erabilera orokorreko bidaiarien garraio publiko erregularreko zerbitzua emateko kontratua sinatzeko. Zerbitzuaren kontratazioa laster aterako da lizitaziora, eta 10 urterako planteatzen da, 2028 eta 2037 artean, eta 47.224.809,55 euroko balio zenbatetsia du, BEZik gabe.
Nafarroako ipar-mendebalderako garraioaren emakida berria tresna estrategiko gisa diseinatu da lurralde-kohesioa, zerbitzuak eskuratzeko ekitatea eta mugikortasunaren iraunkortasuna bermatzeko Nafarroako ipar-mendebaldean. Hiriarteko garraio publikoa berrantolatzeko prozesuan kokatzen da, eta horren helburua da mugikortasun-eredu eraginkorrago, irisgarriago eta egituratzaileago bat lortzeko bidean aurrera egitea, batez ere landa-eremuetan eta biztanleria-dentsitate txikikoetan.
Beste helburu batzuen artean, zerbitzuaren eraginkortasun teknikoa eta ekonomikoa, ingurumen-arloko iraunkortasuna eta mugikortasun murriztuko pertsonentzako irisgarritasuna landu nahi dira.
Proposatutako zerbitzu berria zerbitzu erregularren eta eskariaren araberako zerbitzuen arabera egituratu da. Linea erregularrek Iruñea eta Donostia lotuko dituzte, eta ardatz nagusi hori gertutasuneko zerbitzuekin konbinatuko da; era horretan, nukleo txikiak Nafarroako hiriburuarekin lotuko dira Leitza/Goizueta/Arano – Hernani ardatzaren bidez. Era berean, Gipuzkoako kostaldearekin urtaroko konexioa egin ahal izango da, eta Iruñearen, Lekunberriren, Leitzaren eta Aresoren arteko eta Leitza eta Gipuzkoako Tolosa arteko mugikortasuna indartuko da. Eskariaren araberako lineen bidez, berriz, udalerri txikiagoak konektatuko dira eskualdeko buruak diren Lekunberri, Betelu, Irurtzun eta Auzarekin, eta horietan Iruñearekin lotu ahal izango da. Txulapain, Atetz eta Odieta ingurutik hiriburuarekin zuzenean konektatuko da.
Kontratu berri horretan, gaur egun bost emakidaren esparruan ematen diren zerbitzuak ere sartuko dira; hots, ibilbide hauetakoak: Iruñea-Donostia, (VNA-003), Iruñea-Zarautz, (VNA-005), Iruñea – Doneztebe, (VNA-020), Goizueta-Hernani, (VNA-030) eta Aldatz – Iruñea, (VNA-032).
Lurralde Kohesiorako Departamentua kontratazioa prestatzeko jarduerak egiten ari da jada, zerbitzuak emateko modalitatearen bidez.
Kontratuaren lehen urteko kostua (BEZ gabe) 3.671.234,87 eurokoa izango da, eta horietatik 3.238.782,71 euro zerbitzu erregularrekoak dira eta 432.452,16 euro eskariaren araberako zerbitzukoak. Zerbitzu erregularra autobusen bidez emango da, eta eskariaren araberako zerbitzua turismo-ibilgailuen edo handiagoen bidez eman ahal izango da, garraio publikorako dagokion baimena baldin badute.
