Barakaldoko Udaleko Bero-boladak eragindako Arriskuen Aurrean Jarduteko Planaren Krisi Mahaia berriro bildu da gaur, Euskadin eragina duten tenperatura altuen bilakaera aztertzeko, termometroek 40 graduak gainditzea espero baita. Egoera aztertu ondoren, eta Eusko Jaurlaritzako Segurtasun eta Larrialdi Sailak eta EUDELek emandako gomendioak kontuan hartuta, Udalak San Joan gauean aurreikusitako suak egiteko baimenik ez ematea erabaki du, eta edozein motatako suak piztea debekatzea, zuziak, sutedun baldeak, parrillak edo barbakoak barne, baita material piroteknikoa erabiltzea ere, muturreko tenperaturak direla eta alarma gorria piztuta dagoen bitartean.
«Alarma gorria gutxienez bihar asteartera eta asteazkenera zabaldu da, eta, gainera, abisu horia dugu asteazken osoan baso-suteak izateko arriskuagatik. Zuhurtasunez jokatuko dugu eta pertsonei edo gure inguruari arriskuak eragin diezazkiokeen edozein egoera saihestuko dugu», adierazi du Amaia del Campo Barakaldoko alkateak.
San Juan dela eta auzoetan programatutako jolas jarduerak egin ahal izango dira, baldin eta 20:00etatik aurrera egiten badira, muturreko beroagatiko alarma gorriaren aldiaren amaierarekin batera.
HAUR ESKOLAK LEHENAGO ITXIKO DIRA ETA ADINEKOENTZAKO ARRETA TELEFONOZ
Krisi Mahaiak hurrengo egunetan atzo aktibatutako prebentzio-neurriak mantentzea erabaki du, kolektibo kalteberenaren babesari arreta berezia eskainiz. Ildo horretan, haurrek, adinekoek eta aurretiko patologiak dituzten pertsonek arrisku handieneko orduetan, 12:00etatik 20:00etara, kalera irtetea saihesteko gomendioa azpimarratu da, alerta gorria aktibatzearekin batera. Era berean, Eusko Jaurlaritzaren Haurreskolak Partzuergoak hartutako neurriei jarraituz, Udal Haur Eskolek bihar (asteartea) eta asteazkenean 13:00tan itxiko dira.
Egunean zehar, Udalak, Gurutze Gorriaren laguntzarekin, bakarrik bizi diren adinekoen jarraipena indartu du telefono deien operatibo baten bidez, haien egoera ezagutzeko, autobabeserako gomendioak gogorarazteko eta etxean gera daitezen aholkatzeko, tenperatura maximoko orduetan ezinbesteko premiarik izan ezean. Guztira 1.400 etxe ingururekin jarriko gara harremanetan.
Gainera, bertan behera utzi dira adinekoei zuzendutako kirol jarduerak, hala nola Zapatilak programa, non pertsona taldeak hiriko hainbat gunetan ibiltzen diren. Etenaldiak astelehen, astearte eta asteazkenetan izango du eragina. Era berean, gizarte-zerbitzuei jakinarazi zaie, ahal den guztietan, aurrez aurreko hitzorduen ordez telefono bidezko arreta jarri behar dela.
UDAL ZERBITZUAK EGOKITZEA
Udal-zerbitzuei dagokienez, Udalak berariazko neurriak garatzen jarraitzen du espazio publikoetan beroaren ondorioak murrizteko eta kanpoaldean lan egiten duten langileak babesteko. Goizetan ur-baldekadak egiten dira jende gehien biltzen den lekuetan, giroa freskatzen laguntzeko. Arratsaldeetan espaloiak garbitzen jarraituko dugu. Era berean, bide publikoan ekorketa, gainezka egitea eta lorezaintza lanak aldi baterako bertan behera utzi dira, udal langileak tenperatura altuen eraginpean luzaroan egon ez daitezen.
Parke eta lorategien eremuan, ureztatzea indartzen ari da aspertsio sistemen bidez. Sistema horiek bi ordutik behin aktibatzen dira, 15 bat minutuz, hezetasunari eusteko eta berdeguneetako estres termikoa murrizteko.
ERANTZUKIZUNAREN ETA ZUHURTZIAREN ALDEKO DEIA
Udalak herritarrei gogorarazi nahi die garrantzitsua dela autobabeserako gomendioei jarraitzea: hidratatuta egotea, egunaren erdiko orduetan eguzkitan ez egotea, leku freskoetan egotea eta adingabeei, adinekoei eta gaixotasun kronikoak dituzten pertsonei arreta berezia eskaintzea.
Krisi Mahaiak etengabe jarraituko du bilakaera meteorologikoaren jarraipena egiten, eta herritarren segurtasuna bermatzeko beharrezkoak diren neurriak hartuko ditu.
Gainera, Udalaren kanal ofizialetan (sare sozialak eta Whastsapp Infobarakaldoren doako kanala) bero alarma gorria dela eta hartutako neurrien inguruko berrikuntzen berri izatea gomendatzen zaie herritarrei.
