- 2025eko uztailean Euskadin osasun-egonaldia amaitu zuten 106 familia-medikuetatik, guztiek egin dute lan uneren batean Osakidetzan, eta 102k erakundeari lotuta jarraitzen dute. Gainera, Euskaditik kanpo prestatutako 17 espezialista euskal osasun-sisteman sartu dira, eta jardunean dauden profesionalen kopurua 119ra hazi da
- Eusko Jaurlaritzako Osasun Sailak Prestakuntza Sanitario Espezializatuaren aldeko apustua indartu du, eta 2026-2027 urterako 589 plaza eskaini ditu, 100 plaza gehiago azken 5 urteetan
- Beste urte batez, Euskadik Lehen Mailako Arretari lotutako kategorietan eskain daitekeen gehieneko plaza-kopurua eskaini du, guztizkoaren herena baino gehiago, eta nabarmentzekoak dira deialdi honetan bigarren aldiz eskaintzen diren Urgentzietako eta Larrialdietako Medikuntzako prestakuntzako 20 plazak
Garapen profesionalerako, talentua fidelizatzeko eta espezialista berriak erakartzeko osasun-sistema erakargarria sendotzen jarraitzen du Osakidetzak. Familia eta Komunitateko Medikuntzako 106 barneko mediku egoiliarrek (BAME) Euskadin prestakuntza amaitu eta urtebetera, diziplina horretako 119 espezialistak Osakidetzan egiten dute lan gaur egun. Kopuru hori prestatutako profesionalen % 112 da, eta horrek adierazten du Euskadik, sortzen duen talentuari eusteaz gain, beste autonomia-erkidegoetatik datozen profesionalak erakartzen dituela.
2025eko uztailean osasun-egonaldia amaitu zuten 106 pertsonetatik, denek egin dute lan ordutik uneren batean Osakidetzan. 2026ko uztailean, 102k jarraitzen dute profesionalki erakundeari lotuta, hau da, jarraipen-tasa % 96tik gorakoa da. Horiez gain, Familia eta Komunitateko Medikuntzako beste 17 mediku espezialista daude, Euskaditik kanpo beren prestakuntza egin eta ondoren Osakidetzan sartu direnak. Fidelizazioaren eta talentua erakartzearen konbinazio horri esker, euskal osasun-sistemak 119 profesional ditu gaur egun lanean.
Zehazki, Familiako Medikuntzako 85 profesionalek, beren osasun-egonaldia amaituta, Osakidetzako Lehen Mailako Arretan egiten dute lan gaur egun, eta euskal osasun-sistemaren eremu estrategikoetako bat indartzen laguntzen dute. Beste 34 pertsonak Osakidetzaren hainbat asistentzia-dispositibotan lan egiten dute, hala nola zainketa aringarrietan, larrialdietan, ospitaleko larrialdietan, etxeko ospitalizazioan eta familia eta komunitateko medikuntzako zerbitzuetan.
Prestakuntza Sanitario Espezializatuko 2026-2027 deialdi berria
Osasun-arloko profesionalen prestakuntzarekin eta belaunaldi-berritzearekin duen konpromisoarekin bat etorrita, Eusko Jaurlaritzako Osasun Sailak 2026-2027 deialdian Prestakuntza Sanitario Espezializatuko 589 plaza eskainiko ditu guztira, hau da, 100 plaza gehiago azken 5 urteetan eta aurreko urtean baino 12 plaza gehiago; hala, prestakuntza-eskaintzaren maximo historikoetan kokatu da berriro ere Euskadi.
Azken hamarkadan, Euskadin gazteentzako prestakuntza-plazen eskaintza % 60 handitu da. Osasun-arloko profesionalen belaunaldi-aldaketa bermatzen jarraitzeko beharrari erantzuten dio plazak handitze horrek, bai eta sistema biztanleriaren zahartzeak eta kronikotasunaren hazkundeak eragindako asistentzia-erronka berrietara egokitzeko beharrari ere.
Euskadirentzat lehentasun estrategikoa oraindik ere Lehen Mailako Arretari lotutako espezialitateak eta estaltzen zailak diren eremuak indartzea. Aurten, Lehen Mailako Arretari lotutako kategorietan ahalik eta plaza gehien eskaini dira, eta hori da lehentasun estrategikoetako bat. Zehazki, Familia eta Komunitateko Medikuntzako 115 plaza daude, hau da, azken hamarkadan % 33 handitu da; 37 Familia eta Komunitateko Erizaintzan, duela hamar urteko kopurua laukoiztuta; eta 30 Pediatrian, hau da, orduan baino % 20 gehiago. Gainera, Urgentzia eta Larrialdietako Medikuntzan trebatzeko 20 plaza eskaintzen dira bigarren aldiz deialdi honetan, lehenengo deialdian baino 15 plaza gehiago.
Hona hemen kategorien araberako banaketa:
- BAME fakultatiboen 441 plaza.
- BAEE erizaintzako 117 plaza.
- BEP psikologia klinikoko 14 plaza.
- FIR ospitaleko farmaziako 10 plaza.
- Beste espezialitate batzuetako 7 plaza.
Lurraldeka, honela banatzen dira Prestakuntza Espezializatuko 589 plazak: 110 plaza Araban, 319 Bizkaian eta 160 Gipuzkoan.
Prestakuntza hori Euskadin irakaskuntzarako akreditatutako 17 zentro/unitateetan egiten da: 7 ospitale, 2 irakaskuntza-unitate, 6 irakaskuntza-unitate multiprofesional eta 2 irakaskuntza-unitate erizain espezialistentzat.
Talentua prestatu eta gelditu egiten da
Prestakuntza Sanitario Espezializatuaren eskaintza handitzeak eta espezialista berrien laneratze-datuek argi erakusten dute Osasun Sailak eta Osakidetzak apustu estrategikoa egin dutela euskal osasun-sistema publikoaren giza baliabideak indartzeko, hori baita Euskadiko Osasun Itunean jasotako lehentasunezko lan-ildoetako bat. Profesional gehiago prestatzea, talentua fidelizatzea eta Euskadi jarduera profesionalerako jomuga erakargarri bihurtzea funtsezko helburuak dira datozen hamarkadetan kalitatezko osasun-arreta publikoa bermatzeko.
Datuek erakusten dutenez, Euskadik, prestatzen dituen profesionalak atxikitzeko gaitasun handia izateaz gain, % 100etik gorako erakarpen-ahalmena du, eta osasun-arloko talentuaren saldo positiboa: 106 espezialista prestatu zituen Familia eta Komunitateko Medikuntzan, eta, urtebete geroago, 119 ditu bere osasun-sistema publikoan lanean.
