‘Azterketaren atarian’, Jokin Bildarraitzen artikulua

Nork ez du ezagutzen azterketa baten atarian, ikasturtean zehar ikasi ez izanagatik, gau-pasa eginez edota txuletak prestatuz bere prestakuntza eza nola edo hala konpontzen saiatu den pertsonaren bat?

Ideia hau ekarri dit gogora aste honetan Senatuan Nerea Ahedo taldekideak egindako hitzaldiak. PPk osasunerako Estatu Itun bat egitea eskatu du, nonbait COVID-19ak eragindako egoerak beharrizan hori sortu omen duelako. Berau Kongresuan martxan dagoen Berreraikuntzarako Batzordean 10 eguneko eztabaidaren osteko ondorioetan oinarrituko dela iragarri dute. “Hamar egun Espainia berreraikitzeko!”, barre egin zien Nereak.

Egia da pandemia hau gestionatzea ez dela erraza izan inongo gobernu edo agintarirentzat, baina onartu beharra dago erantzuna eta eragina desberdinak izan direla tokien arabera. Izan ere, honi erantzun egokia emateko ez da nahikoa 10 eguneko hausnarketa, ezta hiru hilabeteko gestioa; azken hamar urte edo hamarkadatan zehar egiten den antolaketa batean oinarritzen da, Euskadin egin den bezala. Inork espero ez zuen tamainako osasun larrialdiari eman beharreko erantzuna ez da egun batetik bestera antolatzen den zerbait.

Eta orain, ikasgelakoen notaren batez bestekoa txarra izan denean, soluzio azkar eta orokorrak bilatzen hasiak dira, ikasle bikain, erdipurdiko zein txuletadunak zaku berean sartuz. Osasun arloan urteetan zehar inbertsio handiak egin dituztenak, horretan hainbeste gastatu ez dutenak zein pribatizazioaren aldeko hautua egindakoak maila berean jarri eta, adibidez, Europatik etorritako diru laguntza bereziak banatzerako irizpideak markatzerakoan populazioaren arabera edota hildakoen kopuruaren arabera egiteko eskatzen dute, edota Autonomia Erkidegoen esku dauden osasun eskuduntzak birzentralizatzerako bidea hartzen dute.

Hauteskunde kanpainan gauden honetan, asko izango dira, baita ere, euren programa eta hitzaldietan uztailaren 12ko azterketa nola edo hala gainditzeko azken orduko burutazioa edo txuleta aterako dutenak. Beste batzuk ibilbide akademiko errealista bezain eraginkorra izaten jarraituko dugu. Osasun arloari dagokionez: ondo funtzionatzen duen egitura sendotuz eta, horretarako, gure eskuduntzak kanpoko erasoen aurka defendatuz. Etxeko lanak ondo eginda goaz azterketara.