ETSk abuztuaren 11n hasiko ditu Salburua eta zerbitzuan dagoen tranbiaren trazadura lotzeko lanak

Eusko Jaurlaritzako Lurralde Plangintza, Etxebizitza eta Garraio Sailaren esku dagoen Euskal Trenbide Sarea erakunde publikoak, abuztuaren 11n ekingo dio Salburuako luzapenaren eta Vitoria-Gasteizko tranbiaren zerbitzuko trazaduraren arteko behin betiko konexioa egiteko lanen azken faseari.

Lan horiek irailaren 6ra arte luzatuko dira. Florida kaleko maniobra-maukako tranbia-zirkulazioak kenduko dira, eta, horrela Ibaiondo, Abetxuko eta zentroko adarretan zerbitzuaren maiztasuna murriztuko da.

Joan den ekainaren 27an, Jose Lejarreta kaleko zirkulazioa eten zen Florida kalearekin duen lotunean, eta eraispen-lanak eta ukitutako zerbitzuen kudeaketa hasi ziren. Ondoren, tranbiaren plataformaren eta trenbide berrien parte bat eraiki da. Bestalde, zutoinak eta katenariaren beste elementu batzuk egokitzeko lanak egin dira.

Abuztuaren 11tik aurrera, katenariaren tentsioa eten egingo da Florida kaleko mauka trenbidean. Horrek, tranbiaren zirkulazioa galarazteaz gain, bi trenbide tarteak lotzeko lanei ekitea ahalbidetuko du.

Urbanizazio lanak amaitu ondoren, irailaren 7an, Jose Lejarreta kalea eta Florida arteko konexioa berriro irekiko da zirkulaziorako.

Eraginak Zerbitzuan

Tranbiaren trafikoan eraginak irailaren 6an amaituko dira. Egun horretatik aurrera, trenbideak fisikoki lotuta egongo dira, Salburuako tarte berrian oraindik zirkulatzea ezinezkoa izango den arren.

Horregatik guztiarengatik, eta obra dela eta, abuztuaren 11tik irailaren 6ra bitartean, Ibaiondoko eta Abetxukoko adarretako maiztasuna 15 minututik 20 minutura igoko da, eta Erdialdeko adarrekoa edo enbor komunekoa, berriz, 7,5 minututik 10 minutura. Bi adarrek Unibertsitatean amaituko dute zerbitzua. Gaur egun, Abetxukoko adarrak Floridako geltokian amaitzen du.

Erabiltzaileek hemen jaso dezakete informazio gehiago:

– Tranbiaren geralekuetan

– Euskotrenen telefono-zenbakian: 944 333 333

– Webgunean: www.euskotren.eus

– Twitterren: @euskotren

– Euskotrenen APP ofizialean