Zabalik dago Nafarroako Gobernuak, Industriako eta Enpresen Trantsizio Ekologiko eta Digitalerako Departamentuaren bitartez, aurten NAEX Talentua programaren baitan emango dituen 12 bekak eskatzeko epea. Programaren bigarren edizioa da, eta oraingoan 12 pertsonari emango die beka Nafarroako Unibertsitate Publikoaren International Business Unibertsitate Master berria egiteko; horietako 10ek prestakuntza osatuko dute kanpoko praktikekin. Eskabideak telematikoki aurkeztu ahal izango dira apirilaren 15era arte.
