Lehendakariordeak eta Ekonomia, Lan eta Enplegu sailburuak Suspertze eta Erresilientzia Mekanismoaren eraginari buruzko Europako goi mailako topaketa batean hartu du parte

• “Zorroztasunez ebaluatzea eta erronkei aurrea hartzea funtsezkoa da gure politika publikoak hobetzen jarraitzeko”, azpimarratu du Mikel Torresek Bruselan egindako Europako funtsen konferentzia batean

Eusko Jaurlaritzako Lehendakariorde eta Ekonomia, Lan eta Enplegu sailburu Mikel Torresek “Suspertze eta Erresilientzia Mekanismoaren eragina ulertzea” izeneko Ikerketa Konferentzian hartu du parte ostegun honetan. Europar Batasunaren suspertze tresna nagusiaren ondorio ekonomiko, sozial eta estrukturalen azterketa ardatz duen Europako erreferentziako foroa da.

“Ezagutza partekatzea, zorrotz ebaluatzea eta erronkei aurre hartzea funtsezkoa da gure politika publikoak hobetzen jarraitzeko”, azpimarratu du Torresek, Iñaki Ruiz Ekonomia sailburuordearekin eta Gabriel Gutierrez Planifikazio eta Egiturazkoal ez diren Funtsen zuzendariarekin batera Bruselan.

Topaketan, erakundeetako arduradunak, ikertzaileak eta politika publikoetako adituak bildu dira, Suspertze eta Erresilientzia Mekanismoa gauza zedin azken urtean lortutako aurrerapenak ebaluatzeko, eta estatu kideetan hazkundeari, produktibitateari, enpleguari eta trantsizio berde eta digitalari egiten dioten ekarpenari buruz hausnartzeko.

Jardunaldian, goi mailako eztabaida politikoak, saio teknikoak eta aurkezpen akademikoak egin dira, eragin makroekonomikoa, erreformen gobernantza eta enpleguan, energian eta ingurumenean dituzten eraginak ardatz hartuta.

Valdis Dombrovskis Ekonomia eta Produktibitate, Inplementazio eta Sinplifikazio komisarioak eman dio hasiera konferentziari, eta Europako agintari eta Europako Batzordeko arduradun garrantzitsuek hartu dute parte. Erakundeen eta ikertzaileen arteko elkarrizketa gune izan da, eta ebidentzietan oinarritutako ebaluazioan eta suspertze mekanismoaren esparruan bultzatutako erreformen kalitatean jarri du arreta.