- Eusko Jaurlaritzako Larrialdiei Aurre Egiteko eta Meteorologiako Zuzendaritzak koordinatuta, hiru lurralde historikoetako baliabideak eta Larrialdiei Aurre egiteko Euskal Sisteman sartuta dauden hainbat erakunde bildu dira.
- Simulakroari esker, lurreko eta aireko baliabideen arteko koordinazioa, komunikazioen elkarreragingarritasuna eta baliabideak aldi bereko egoeretan kudeatzea entrenatu ahal izan dira.
Eusko Jaurlaritzak, Larrialdiei Aurre Egiteko eta Meteorologiako Zuzendaritzaren bitartez, lurralde arteko koordinazio-simulakro bat egin du gaur goizean, Besaide inguruan piztutako baso-sute baten aurrean.
Simulakroa SOS Deiak-eko larrialdietan esku hartzeko taldeko langileek gidatu dute, Bizkaiko Foru Aldundiko Mendi Zerbitzuaren laguntzarekin, eta hiru lurralde historikoetako baliabideak eta medio espezializatuak bildu ditu, erantzun bateratua, koordinatua eta eraginkorra emateko konplexutasun operatibo handiko egoera baten aurrean.
Simulakroa lurralde arteko koordinazio-praktika gisa planteatu da. Bertan, lurraldez gaindiko eragina duen baso-sute bat gertatu da, intzidenteak aldi berean gertatu dira eta hainbat administrazioren baliabideak mobilizatu behar dira, elkarrekin lan egiteko kultura komun batean aurrera egiten jarraitzeko, erakundeen arteko laguntza-mekanismoak indartzeko eta zerbitzu, agintari eta erakunde parte-hartzaileen arteko elkar ezagutza hobetzeko.
Jardunari esker, larrialdi mota horiek kudeatzeko funtsezko alderdiak egiaztatu eta entrenatu ahal izan dira, hala nola Baliabideak Hartzeko Zentroaren eta Aginte Postu Aurreratuaren eraketa eta funtzionamendua, larrialdi-gelen eta landa-aginteen arteko koordinazioa, lurreko eta aireko baliabideen integrazioa, komunikazio operatiboen kudeaketa, sutearen sektorizazioa, baliabideen lehentasuna eta agertoki dinamikoetan erabakiak batera hartzea.
EGOERA ETA OPERATIBOA
Kasu praktikoak Bizkaian aldi berean piztutako baso-sute anitzen itxura eman du, batez ere eremu mugakideetan eta iristeko zailak diren eremuetan, lurraldeko beste puntu batzuetarako bilakaera progresiboarekin. Eszenatokia udaberri bero eta lehorreko baldintza meteorologiko simulatuetan kokatu da, erraz erretzeko landareak, hego haize lehorra, hezetasun erlatibo txikia eta topografiak eragindako hedapen azkarrak dituela.
Testuinguru horretan, sute nagusietako bat Besaideko baso-ingurunean izan da. Bertan, landaredi lehorraren gaineko linea elektriko baten azpian piztutako sutea irudikatu da. Haizeak, maldak eta erregaiaren jarraitutasunak eragindako sutearen bilakaeraren ondorioz, lurralde arteko koordinazio-mekanismoak eta erakundeen arteko elkarrekiko laguntza-prozedurak aktibatu behar izan dira.
LARRIALDIEI AURRE EGITEKO EUSKAL SISTEMA
Praktika bateratuan, Larrialdiei Aurregiteko Euskal Sisteman integratutako hainbat zerbitzu operatibok parte hartu dute, hiru lurralde historikoetako ordezkariekin. Horien artean, honako hauek izan dira: mendietako zerbitzuak, baso-brigadak, foru eta udal suhiltzaileak, 112 SOS Deiak, Eusko Jaurlaritzako Larrialdietan Esku Hartzeko teknikariak, Ertzaintza (Mendiko Zaintza eta Erreskate Unitatea eta Droneak), Gurutze Gorria, DYA, Babes Zibila eta Euskadiko Suhiltzaileen Elkartea.
Ekitaldiko koordinazio orokorra 112 SOS Deiak-en eta Larrialdiei Aurre Egiteko eta Meteorologiako Zuzendaritzaren bidez egin da, eta aginte- eta koordinazio operatiboko maila desberdinak integratu dira eta baliabideen mobilizazio mailakatua, aginte operatiboen integrazioa, erakunde autonomikoen, foralen eta udalen arteko koordinazioa, komunikazioen kudeaketa bateratua eta aire-lurra koordinazioa landu dira.
EKITALDIAREN GARAPENA.
Ariketa operatiboak 10:00etan hasi dira, suposizio praktikoa aktibatuta eta baliabideen mobilizazio mailakatuarekin. Ondoren, baliabide desberdinak esleitutako esku-hartze alderdietara mugitu dira, Aginte Postu Aurreratua eratu da eta sutea sektorizatu da, lehentasun taktikoak ezarri dira eta lehen maniobrak zabaldu dira.
11:00etatik 13:00etara bitartean, itzaltze-maniobrak, zuzeneko eta zeharkako erasoak eta lurreko eta aireko bitartekoen arteko defentsa- eta koordinazio-lerroak egin dira. Bitartean, aldi berean, lurreko eta aireko zaintza- eta azterketa-lanak egin dira, Ertzaintzaren droneak erabiliz.
Ekitaldia 14:00etan amaitu da, amaierako briefing-arekin eta parte hartzen duten baliabideen desmobilizazio mailakatuarekin.
ETENGABEKO HOBEKUNTZA ETA IKASKUNTZA PARTEKATUA
Maniobrak amaitu ondoren, briefinga egin da parte hartu duten erakundeekin batera, ariketaren garapena aztertzeko, jardunbide egokiak identifikatzeko eta hobetzeko aukerak detektatzeko. Saio honetan hainbat alderdi berrikusi dira, hala nola lurraldeen arteko koordinazioa, zerbitzuen arteko elkarreragingarritasuna, komunikazioen kudeaketa, aginte-postu aurreratuaren funtzionamendua, aire-lurra integrazioa, erantzun-denborak, segurtasun operatiboa, erabakiak hartzea eta kudeaketa logistikoa.
Praktika horrekin, Larrialdiei Aurre Egiteko Euskal Sistemak erantzun partekatua emateko gaitasuna indartu du, administrazioen eta zerbitzuen arteko koordinazio-prozedurak finkatu ditu, eta baso-larrialdi handien kudeaketaren etengabeko hobekuntzan aurrera egin du.
