- Osasun Sailak Ministerioari igorri dio Esparru Estatutuari buruzko iritzia; alegazio tekniko kritikoak egin ditu baina edukiak propositiboak dira. Txosten juridiko bat ere erantsi du, eta bertan estatuaren eskumena aitortzen du, oinarrizko araua delako
- Eusko Jaurlaritzak ohartarazi du Esparru Estatutuak eragin zuzena duela asistentzia-zerbitzuetan, eta eskatu du adostasuna eta erkidegoen esparrua errespetatzea
- Euskadi ados dago erreformak ezin duela aurrera egin akordiorik gabe, finantziazio nahikorik gabe eta autonomia-erkidegoekin eta profesionalekin benetako negoziaziorik gabe
- Eusko Jaurlaritzak, ordea, elkarrizketari eusten dio Euskadin, eta sindikatuekin batera ari da medikuentzako akordioak bilatzeko lanean
Eusko Jaurlaritzako Osasun Sailak Osasun Ministerioari igorri dio Esparru Estatutuaren Lege Aurreproiektuari buruzko iritzia, gai horri buruz aurreikusitako Lurralde arteko Biltzarraren monografikoa egin baino lehen. Biltzar hori, printzipioz, datorren astean egingo da. Ministerioak gaur 14:00ak arte jarri du erkidego guztien informazio hori posta elektronikoz jasotzeko epea, ohikoa ez den eredu baten bidez. Igorritako txostenaren arabera, Euskadik uste du erreforma berriro bideratu behar dela, eta beharrezkoak dira benetako elkarrizketa, erakundeen arteko adostasuna eta inplikatutako eragile guztien parte-hartzea, bazterketarik gabe.
Euskadiren jarrera bi dokumentu bereizitan oinarritzen da. Alde batetik, autonomia-erkidegoek adostutako alegazio-dekalogo bat dago; bertan, Osakidetzak ohar teknikoak eta antolakuntzakoak jasotzen ditu testua hobetzeko, haren osasun-kudeaketaren esperientziatik. Bestetik, izapide administratiboko txosten juridiko batek berariaz aitortzen du Osasun Ministerioak Esparru Estatutuaren erreforma bultzatzeko eskumena duela, oinarrizko araua delako, eta ontzat jotzen du 2003ko araua eguneratzeko aukera. Hala ere, ohartarazten du gai askok zuzenean eragiten diotela kudeaketa autonomikoari, eta osasun-zerbitzu bakoitzaren beharrekin bateragarria den ikuspegia behar dutela.
Osakidetzak aurkeztutako alegazioen artean, honako hauek daude: Estatuaren finantzaketaren beharra sailkapen profesional berrirako, negoziazio-eremuetako funtzio-banaketaren berrikuspena, giza baliabideak antolatzeko planen sinplifikazioa, autonomia-erkidegoek ordainsarien arloan duten autonomiaren defentsa, tarteko karguetarako bateraezintasunen malgutasuna eta hautaketa-epeen egokitzapena, ordezkapen-zerrendak, estaldura zaileko pizgarriak eta guardiako lanaldi egokituak, antolamendu-sistemaren errealitateari erantzuten diotenak.
Osasun Sailak azpimarratu du Euskadik ez duela inoiz zalantzan jarri Osasun Ministerioak Esparru Estatutua aldatzeko duen eskumena, baina oinarrizko araua akordio instituzional, sozial eta profesional zabalaren bidez eraiki behar dela defendatu du. Ildo berean, Eusko Jaurlaritza bat dator gainerako autonomia-erkidegoekin. Horien arabera, egungo testuak oraindik ez du behar besteko adostasunik, ez du behar besteko finantzaketarik eta ez da bideragarria Aurrekontu Orokorrik gabe, eta, batez ere, ez dago egikaritzeko denborarik. Beraz, berriz pentsatu behar da, eragile guztien arteko elkarrizketari aukera berri bat emateko, inor baztertu gabe.
Euskadin, bien bitartean, Eusko Jaurlaritzak mahai sektorialean akordiorako bidea irekita du. Osasun Sailak eta Osakidetzak hilabeteak daramatzate lanean medikuen esparruko sindikatuekin, kolektiboaren berezitasunak jorratzeko eta jarrerak hurbiltzeko, eta laster aurre-akordio bat lortzea da helburua.
Osasun Sailak defendatu du Ministerioaren eskumena dela Esparru Estatutuaren erreforma, baina, nabarmendu duenez, aurrera egin ahal izango da berriro ere alde guztiekin hitz egiten hasten bada, finantzaketa, errealismoa eta negoziazioaren bidez. Hori guztia osasun-zerbitzuen aniztasuna eta herritarrei ematen zaien laguntzan duen benetako eragina kontuan hartuta.
