- Bingen Zupiriak eta Iratxe Uriarte Eigurenek gidatu dute gaur egungo eraldaketa sozial eta teknologikoaren testuinguruan gazteei eragiten dieten erronka nagusien inguruko eztabaida.
Gaur arratsaldean, Bilboko “La Perrera” gunean, Basque Segurtasun Foroaren hogeita zazpigarren bilera egin da. Oraingo honetan, segurtasuna eta horrek eguneroko bizitzan duen eragina Euskadiko gazteengana hurbiltzea izan da helburua.
Topaketan Segurtasuneko sailburu Bingen Zupiriak eta Euskadiko Gazteriaren Kontseiluko (EGK) presidente Iratxe Uriarte Eigurenek parte hartu dute, eta bertan izan dira, halaber, Eusko Jaurlaritza, EGK, Ertzaintza eta Bilboko Udala bezalako erakunde publikoetako ordezkariak, baita unibertsitate-eremuko ordezkariak, elkartegintzako eragileak eta komunitate-lanarekin, berdintasunarekin, gazteen parte-hartzearekin eta gizarte-esku-hartzearekin lotutako erakundeak ere.
Saioan zehar, bertaratutakoek gaur egungo eraldaketa sozial eta teknologikoaren testuinguruan gazteei eragiten dieten erronka nagusietako batzuen inguruko diagnostikoak eta proposamenak partekatu dituzte. Jorratutako gaien artean izan dira mugitzeko askatasuna, egonkortasun emozionala, segurtasun digitala eta sortzen ari diren arrisku berrien aurrean prebentzio estrategikoa.
Parte-hartze prozesua Euskadi osoan
Gaurkoa Basque Segurtasun Foroaren hogeita zazpigarren bilera izan da, aurretik Hernanialdea, Urdaibaien, Urola Garaian, Uribe Kostan, Urola Erdian, Gasteizen, Ibaizabalen, Bidasoan, Mungialdean, Goierrin, Debagoienan, Meatzaldean, Arabako Errioxan eta Arabako Mendialdean, Oarsoaldean, Bilbon, Aiaraldean, Urola Kostan, Lea-Artibain, Ezkerraldean, Debabarrenean, Enkarterrin, Araban, Gipuzkoan eta Bizkaian egindako saioen ondoren.
Basque Segurtasun Foroa parte-hartze prozesu bat da, segurtasunari buruzko diagnostiko partekatu bat ikuspegi integral batetik eraikitzeko. Prozesu horretan, hainbat erakundek, entitatek eta eragilek topagune bat izango dute kezkatzen dituen segurtasunarekin lotutako gaiak lantzeko: herritarren segurtasuna, larrialdi klimatikoa, mugikortasuna, ekitaldi handiak, zibersegurtasuna, larrialdiak
Basque Segurtasun Foroaren hurrengo bilera, datorren asteartean, maiatzaren 26an izango da, Erandion.
